Neytendasamtökin hafa gefið út þrjár viðamiklar skýrslur um aðstæður á vátryggingamarkaði og gert tillögur um nauðsynlegar úrbætur. Skýrslurnar og tillögurnar eru aðgengilegar á vefsíðu samtakanna, ns.is.
Í skýrslunum er áréttað margt af því sem FÍB hefur talið aðfinnsluvert við starfsemi tryggingafélaganna. Í skýrslum Neytendasamtakanna er íslenski tryggingamarkaðurinn settur í samhengi við stærðir á Norðurlöndum og í ríkjum OECD. Gerð er grein fyrir áhrifum samkeppni/fákeppni, skaðabótarétti og skatta á markaðinn. Arðsemi tryggingastarfseminnar er skoðuð og reifaðar áskoranir, sem og tækifæri, og settar fram raunhæfar tillögur til úrbóta.
Nokkrar tillagna Neytendasamtakanna
Neytendasamtökin benda á mikilvægi þess að örorkumat vegna líkamstjóna verði samræmt, sjálfstætt og á einni hendi. Liðin eru 13 ár frá því að tryggingafélögin lögðu sjálf fram tillögur í þá veru. Frumvarp um breytingar var unnið fyrir dómsmálaráðuneytið 2022 en ekkert frekar hefur gerst. FÍB hefur margsinnis fjallað um að minnka þurfi þann 4 milljarða króna kostnað sem fellur til árlega við örorkumat hjá tryggingafélögunum og lækka iðgjöld á móti.
Meðal tillagna Neytendasamtakanna um úrbætur er að skoðað verði hvort ástæða sé til að setja lágmark varanlegrar örorku, nokkurs konar gólf líkt og er á Norðurlöndum. Um 90% mála og 80% heildargreiðsla örorkubóta hafa verið vegna örorku undir 15%. Örorkubótum er ætlað að koma í stað framtíðartekjumissis, en vísbendingar eru um að örorka undir 15% þurfi ekki alltaf að hafa áhrif á framtíðartekjur. Með lækkun eða afnámi þessara bótagreiðslna megi lækka iðgjöld trygginga.
