Tesla Model Y er á góðri leið með að verða vinsælasti bíllinn fjórða árið í röð í Noregi. Þrátt fyrir erfiðleika víða í Evrópu, heldur Tesla áfram að vaxa í Noregi. Í byrjun september var Model Y kominn með 8.791 bíla forskot á Toyota bZ4X, sem er sem stendur í öðru sæti yfir nýskráningar hjá OFV. VW ID.4 er í humátt á eftir Toyota.
Alls voru 13.915 nýir fólksbílar nýskráðir í Noregi í ágúst og 98.996 bílar á fyrstu átta mánuðum ársins sem sýnir ákveðna bjartsýni á meðal landsmanna.
Hlutdeild rafbíla í nýskráningum í Noregi 96,6%
Með 96,9% hlutdeild rafbíla eru jarðefnaeldsneytis- og tengiltvinnbílar ekki eftirsóttir og aðeins leifar eru eftir fyrir birgja með margar jarðefnaeldsneytisbílagerðir í boði. Toyota er meðal þeirra, en á sama tíma er Toyota Yaris Cross vinsælastur hjá þeim sem enn kjósa að fylla á tankinn.
Kínversku merkin stóðu sig ótrúlega vel í júlí en í ágúst voru þau aftur komin niður í eðlilegra stig með 11,3% hlutdeild í nýskráningum. Þá eru ekki meðtaldir Kína-framleiddir bílar frá vestrænum merkjum. Ef þeim er bætt við hækkar hlutfallið í 18,4%. BYD, MG og Xpeng standa sig best meðal kínversku merkjanna.
Þrír af hverjum fjórum nýjum bílakaupendum velja enn bíla með fjórhjóladrifi
Þrír af hverjum fjórum nýjum bílakaupendum velja enn bíla með fjórhjóladrifi. Hlutfallið virðist vera nokkuð stöðugt. Innflutningur á notuðum fólksbílum dróst saman um 8,3% í ágúst, miðað við ágúst í fyrra. 642 bílar voru fluttir inn, flestir rafbílar, en það er aðeins 4,4% af heildarfjölda nýskráninga.
