Vegagerðin vinnur nú að greiningu á þörf á skipulagi og uppbyggingu skilvirks og samræmds nets nýorkuinnviða fyrir samgöngur um allt land, með sérstakri áherslu á þarfir þyngri ökutækja.
Verkefnið er unnið að beiðni innviðaráðuneytisins og er mikilvægt skref í orkuskiptum í samgöngum. Með verkefninu er fylgt kröfum AFIR‑reglugerðar ESB nr. 2023/1804 og tekið mið af TEN‑T samgöngunetinu, sem kveður á um að hleðsluinnviðir séu aðgengilegir á helstu meginvegum. Jafnframt er horft til reynslu nágrannaríkjanna á Norðurlöndum, þar sem vegagerðir hafa gegnt lykilhlutverki í greiningu á þörfum notenda og í að leiða uppbyggingu slíkra innviða.
Greining á stöðu hleðsluinnviða
Í fyrsta áfanga verkefnisins er lögð áhersla á að greina og meta stöðu hleðsluinnviða á Íslandi. Þar felst meðal annars ítarleg kortlagning á núverandi hleðslustöðvum á landsvísu og mat á því hvort núverandi net hleðslustöðva uppfylli þjónustu‑ og aðgengiskröfur, sérstaklega þegar litið er til stærri og þyngri ökutækja. Þá eru skoðaðar tæknilegar forsendur eins og afkastageta stöðva, aðgangur að orku og tengingar þeirra við stofnvegakerfið.
Mótun framtíðarskipulags
Samhliða þessari greiningu er unnið að mótun framtíðarskipulags hleðsluinnviða. Unnið er að því að skilgreina hvernig hleðslustöðvar skulu hannaðar og hvaða þjónustukröfur þær þurfa að uppfylla, auk þess sem settar eru forsendur um mögulega staðsetningu þeirra á landsvísu. Mikilvægt er að allt skipulag samræmist samgönguáætlun og helstu áherslum í þróun vegakerfis, hafna og flugvalla.
Jafnframt eru gerðar áætlanir um fjárhagslegar og framkvæmdalegar forsendur verkefnisins, þar á meðal mat á kostnaði, mögulegum rekstrarformum og framlagðar verk‑ og tímaáætlanir til að tryggja hagkvæma og markvissa uppbyggingu.
Markmið verkefnisins er að skapa þétt, öruggt og skilvirkt net hleðsluinnviða sem þjónar bæði flutningabílum, rútum, almenningssamgöngum og fólksbílum. Við skipulagningu er lögð sérstök áhersla á umferðaröryggi og að tryggja að hleðslustöðvar séu rétt tengdar vegakerfinu án þess að vera innan veghelgunar‑ eða öryggissvæða. Þá er tekið mið af þörf fyrir áningarstaði og hvíldarsvæði í samræmi við reglur um vinnuvernd og notendavæna nálgun.
Hugsanleg þörf fyrir opinbera þátttöku
Uppbygging nýorkuinnviða hefur hingað til verið að mestu leyti markaðsdrifin og aðallega beinst að fólksbílum. Stuðningur úr Loftslags‑ og orkusjóði hefur reynst mikilvægur í þessari þróun, en áfram þarf að tryggja fjárfestingu og stuðning sérstaklega við innviði fyrir þungaflutningatæki. Meta þarf hvort opinber þátttaka sé nauðsynleg á ákveðnum svæðum til að tryggja jafnt aðgengi að nýorkuinnviðum.
