FÍB hefur sent kvörtun til Samkeppniseftirlitsins vegna tilrauna hagfræðings Samtaka fyrirtækja í fjármálaþjónustu (SFF) til að hafa skaðleg áhrif á samkeppni í viðskiptum við tryggingafélögin.
Tilefni kvörtunarinnar er vegna viðtals við hagfræðing Samtaka fyrirtækja í fjármálaþjónustu (SFF) í Morgunblaðinu 14. maí síðastliðinn.
Í viðtalinu fullyrti hagfræðingur SFF að afkoma af tryggingum væri lökust á Íslandi og að Ísland væri eina Evrópulandið með viðvarandi tap af vátryggingastarfsemi.
Athugun FÍB á afkomu vátrygginga hér á landi sýnir að fullyrðingar hagfræðingsins eru ýmist rangar eða villandi. Tilgangurinn með þeim virðist sá einn að fá viðskiptavini tryggingafélaganna til að trúa því að ekkert svigrúm sé til að lækka iðgjöld og því skuli þeir ekki sækjast eftir betri kjörum.
FÍB telur að þessi ummæli gangi í berhögg við 12. grein samkeppnislaga, en þar er samtökum á borð við SFF óheimilt að hvetja til aðgerða sem hafa skaðleg áhrif á samkeppni. Rifja má upp að í mars 2022 sektaði Samkeppniseftirlitið SFF um 20 milljónir króna fyrir brot á umræddri grein samkeppnislaga.
Mjólkurkú tekin út fyrir sviga
Fulltrúa SFF var í viðtalinu tíðrætt um hina neikvæðu afkomu af vátryggingastarfsemi hér á landi, en sleppti líftryggingum í því samhengi. Gríðarlegur hagnaður er af líftryggingum og því er afkoman af allri vátryggingastarfsemi hér á landi jákvæð en ekki neikvæð.
Með því að undanskilja líftryggingar úr umræðunni en tala engu að síður um vátryggingastarfsemi telur FÍB að fulltrúi SFF hafi verið að villa um fyrir almenningi í því skyni að letja fólk frá því að sækjast eftir bestu kjörum.
Gamlar tölur notaðar til að afvegaleiða viðskiptavini
Hagfræðingur SFF studdist við tölur alla leið til 2017 fyrir fullyrðingum um laka afkomu af vátryggingastarfseminni. Í kvörtuninni til Samkeppniseftirlitsins spyr FÍB hvers vegna notast sé við allt að sjö ára gamlar tölur. Afkoma síðustu þriggja ára sýni afar jákvæða niðurstöðu af vátryggingastarfseminni. Í því samhengi vekur FÍB sérstaka athygli á því að tryggingafélögin hafa hagnast um 7,8 milljarða króna af lögbundnum ökutækjatryggingum frá 2022 til ársloka 2024. Það bendi ekki til mikillar samkeppni, líkt og hagfræðingur SFF heldur fram, heldur þvert á móti.
Villandi samanburður milli landa
Í blaðaviðtalinu segir starfsmaður SFF að samanburður á vægi ökutækjatrygginga í vísitölu neysluverðs í Evrópulöndum sýni að það sé minnst á Íslandi. Í kvörtun FÍB kemur fram að iðgjöld skyldutrygginga ökutækja eru mun hærri að krónutölu og sem hlutfall af landsframleiðslu en í samanburðarlöndum. Allt tal um vægi þessara trygginga í umræddri vísitölu sé því til að skapa þá röngu mynd að ökutækjatryggingar séu síst óhagstæðari hér á landi, þegar raunin er allt önnur.
Þagað um góða afkomu
Í blaðaviðtalinu ríkir þögn af hálfu starfsmanns SFF um hina afar góðu afkomu af lögbundnum ökutækjatryggingum síðustu árin, að ekki sé talað um líftryggingarnar. Þvert á móti fullyrðir hann aftur og aftur að afkoman sé í mínus. Að mati FÍB er um að ræða grímulausa tilraun til að sannfæra viðskiptavini um að tryggingafélögin í heild sinni hafi ekkert svigrúm til að bjóða lægri iðgjöld. Með því sé reynt að hafa skaðleg áhrif á samkeppni af hálfu SFF, enn og aftur.
