Fréttasíðan FF7.is birti í gær sláandi staðfestingu á þeirri aðferðafræði olíufélaganna að lækka ekki verð á eldsneyti þó heimsmarkaðsverð eða gengi gjaldmiðla lækki.
Í greiningu Helga Frímannssonar verðbréfasérfræðings á afkomu N1 kemur fram að á öðrum ársfjórðungi 2025 (apríl til júní) hafi heildartekjur af sölu eldsneytis og rafmagns aðeins hækkað um 1,5% miðað við sama tíma í fyrra. Aftur á móti skilaði þessi sala 400 milljónum meira í framlegð en árið áður. Lækkun á heimsmarkaðsverði um 17-21% og styrking gengis krónunnar á móti dollar um 12% skilaði sér því ekki til viðskiptavina N1 heldur rann beint til fyrirtækisins.
Í greiningu sinni á FF7.is segir Helgi Frímannsson þetta: „Það er gömul saga og ný að olíuverð á dælu fylgir hækkunum á heimsmarkaði og veikingu krónunnar yfirleitt mun betur en þegar þróunin er í hina áttina. Þetta uppgjör hjá N1 er vísbending um að slík tilgáta sé ekki fjarri lagi.“
Á öðrum ársfjórðungnum var framlegð N1 af sölu eldsneytis 22,4% og hafði hækkað úr 18,9% frá sama tíma árið áður. Framlegð segir til um tekjur að frádregnum breytilegum kostnaði.
Festi móðurfélag N1 áformar að byggja 31 íbúð og endurnýjta hina sögulegu bensínstöð og fá henni nýtt hlutverk sem menningarmiðstöð og kaffihús. Gert er ráð fyrir aðeins 34 bílastæðum í bílageymslu.
Fram kemur hjá Helga í greiningunni á FF7.is að Festi, móðurfélag N1, áætli að rekstrarhagnaður þessa árs verði á bilinu 15,2 til 15,6 milljarðar króna. Það er 23,1% meiri áætlaður hagnaður en var í fyrra. Auk N1 rekur Festi Krónuna, Elko og Lyfju.
