Sænski bílaframleiðandinn Volvo innkallar rúmlega 40.000 rafbíla af gerðinni EX30-SUV vegna hættu á að rafhlöðurnar ofhitni.
„Við höfum nú samband við eigendur allra bíla sem málið varðar til að leiðbeina þeim um næstu skref,“ segir í tilkynningu frá Volvo. Skipta þarf um háspennurafhlöður bílanna. Það verður gert eigendum að kostnaðarlausu. Þangað til eru eigendur hvattir til að takmarka hleðslu bílsins við að hámarki 70 prósent til að útiloka eldhættu.
Sú ákvörðun var tekin þegar í desember að biðja eigendur EX30-SUV í tíu löndum, þar á meðal í Bandaríkjunum, Brasilíu og Ástralíu, um að leggja bílum sínum fjarri byggingum og takmarka hleðslu.
Mikill kostnaður framundan
Talið er að nýjar rafhlöður muni kosta um 195 milljónir Bandaríkjadala. Ofan á það bætist flutnings- og verkstæðiskostnaður. Volvo segir þessar útreikninga vera getgátur og tekur fram að fyrirtækið sé í viðræðum við birgja sinn um kostnaðarskiptingu.
Rafhlöðuvandamálin koma upp á sama tíma og Volvo reynir að fara í gegnum hagræðingu upp á 1,9 milljarða dala, samhliða nánari samþættingu við kínverska eigandann Geely.
Aðrir bílaframleiðendur hafa einnig glímt við galla í rafhlöðum líkt og Volvo. Eldhætta neyddi General Motors til dæmis til að innkalla 140.000 Chevy Bolt bíla árið 2020.
