Ellefu manna sendinefnd frá breskum stjórnvöldum, ásamt fulltrúa úr íslenska fjármálaráðuneytinu, sótti höfuðstöðvar FÍB heim í dag. Tilefnið var fyrirhuguð innleiðing kílómetragjalds á Bretlandseyjum árið 2028 og ríkur áhugi Breta á að læra af reynslu Íslendinga af hliðstæðu kerfi.
Á fundinum upplýstu Runólfur Ólafsson, framkvæmdastjóri FÍB, ásamt öðrum fulltrúum félagsins og Ragnar Bartmarz, sérfræðingur frá fjármálaráðuneytinu, bresku gestina um íslenska kílómetragjaldið sem tekið var upp hér á landi um síðustu áramót. Farið var ítarlega yfir hvernig undirbúningi, framkvæmd og innleiðingu kerfisins hefði verið háttað.
Sýndu íslensku útfærslunni áhuga
Sérstakan áhuga á hafði breska sendinefndin að heyra viðbrögðu félaga í FÍB um útfærslu kílómetragjaldsins og yfir hverju hefði verið mest kvartað. Breska sendinefndin sýndi íslensku útfærslunni mikinn áhuga og spurði fjölmargra spurninga. Að fundi loknum sögðu fulltrúarnir upplýsingarnar vera mjög gagnlegar og gott veganesti inn í þá vinnu sem framundan er í Bretlandi.
Kílómetragjaldið mikið í umræðunni í Bretlandi
Umræðan um kílómetragjald hefur tekið nýja dýpt í Bretlandi eftir stjórnarskipti og vegna örrar fjölgunar rafbíla. Aðalástæðan er fjárhagsleg, en breska ríkið treystir mikið á tekjur af eldsneytissköttum, bensín- og díselgjöldum, og árlegum ökutækjasköttum.
Eftir því sem fleiri skipta yfir í rafbíla myndast gríðarlegt gat í ríkiskassanum. Talið er að breska ríkið gæti tapað allt að 35 milljörðum punda á ári ef ekkert er að gert þegar bannið við sölu nýrra bensín- og díselbíla nálgast.
Mögulegar útfærslur
Þótt engin endanleg útfærsla liggi fyrir hjá breskum stjórnvöldum, hafa nokkrar leiðir verið nefndar. Þar má nefna flatt kílómetragjald, fast gjald fyrir hvern ekinn kílómetra, óháð staðsetningu. Einnig hefur verið í umræðunni rætt um breytilegt gjald sem tekur mið af álagstímum eða umferðarþunga í borgum, en væri lægra á landsbyggðinni.
