Hagfræðingur Samtaka fjármálafyrirtækja (SFF) hélt því fram í viðtali við Morgunblaðið 14. maí síðastliðinn að vægi ökutækjatrygginganna hér á landi væri það minnsta í samræmdri vísitölu neysluverðs á Norðurlöndunum. Ekki fylgdi sögunni hvað þau ummæli áttu að segja lesendum.
Gefur vægi ökutækjatrygginga í vísitölu neysluverðs einhverja hugmynd um kostnaðinn við þær á Norðurlöndunum? Eru iðgjöldin þá kannski bara sanngjörn og lægri hér en í nágrannalöndunum? Ekki aldeilis
Samkvæmt nýjustu tölum frá Statista kosta skyldutryggingar bíla rúmlega 37 þúsund krónur að jafnaði á hvern íbúa Svíþjóðar. Í Danmörku eru samsvarandi tölur 61 þúsund krónur á mann. Á Íslandi nema iðgjöld skyldutrygginganna um 96 þúsund krónum á mann. Ekki beint lægri en í nágrannalöndunum. Þessum tölum ber saman við ítarlega könnun sem FÍB gerði á bílatryggingum á Norðurlöndunum árið 2020. Munurinn er sá sami og þá, tryggingarnar eru mun dýrari hér í öllum samanburði.
Vægið í vísitölu neysluverðs segir því ekkert um kostnaðinn af lögbundnu bílatryggingunum. Hlutfall kostnaðarins af landsframleiðslu (GDP) segir meira. Hér á landi er hlutfallið 0,82% af landsframleiðslunni. Í Danmörku er hlutfallið 0,68% og í Svíþjóð 0,51%.
Það er hins vegar segin saga að SFF leggur sig fram um að mála skrattann á vegginn með sérvalinni nálgun þegar um tryggingafélögin er að ræða, helst einhverju sem kemur málinu ekki við. Reynsla FÍB hefur sýnt að það er engu að treysta þegar SFF eða tryggingafélögin sjálf tjá sig um reksturinn eða stöðu markaðarins.
