Rúmt ár er liðið frá því að Hönnu Katrínu Friðriksson atvinnuvegaráðherra ofbauð hátt vangreiðslugjald á bílastæði við Kirkjufell. Hún sagðist ætla að ráðast í aðgerðir til úrbóta.
Ráðherra kynnti tillögur sínar í janúar á þessu ári. Skerpa ætti á lögum um markaðssetningu, breyta reglugerð um umferðarmerki og setja upp vefsíðu með yfirliti um öll gjaldskyld bílastæði. Ennfremur kæmi hugsanlega til greina að setja eina heildstæða reglugerð um gjaldskyld bílastæði.
Neytendastofa gaf á sama tíma út leiðbeiningar um merkingar, skilmála og greiðslufyrirkomulag á gjaldskyldum bílastæðum.
Ný lög um markaðssetningu tóku gildi í maí. Þau hafa lítil sem engin áhrif haft á það sem kvartað er undan, þ.e. vangreiðslugjöldin. Aftur á móti sektaði Neytendastofa Parka og Easypark í ágúst vegna ófullnægjandi upplýsinga og merkinga. Aðgerðir Neytendastofu virðast alfarið snúa að smáa letrinu.
Staðan í boðuðum aðgerðum stjórnvalda er þessi:
- Vefsíða með yfirliti um gjaldskyld bílastæði hefur ekki verið sett upp.
- Reglugerð um gjaldskyld bílastæði hefur ekki verið sett.
- Reglugerð um umferðarmerki hefur ekki litið dagsins ljós.
Gagnvart bíleigendum hefur því fátt breyst nema að á skiltum við gjaldskyld bílastæði er kominn ítarlegri texti með smærra letri og að reikningar fylgja nú kröfum í heimabanka.
Ræningjarenna ríkisins
Stjórnvöld hafa síðan ekkert aðhafst gagnvart ósvífnustu innheimtunni, hjá sínu eigin fyrirtæki, Isavia. Þar eru miskunnarlaust rukkaðar 500 krónur fyrir hverja mínútu umfram fimm í brottfararrennunni á Keflavíkurflugvelli. Meira um það í annarri grein.
