Hvergi fleiri bensínstöðvar miðað við íbúafjölda

Ísland toppar listann yfir framboð bensínstöðva miðað við höfðatölu innan Evrópu. Íslendingar eiga hlutfallslega fleiri bíla í umferð miðað við íbúafjölda samanborið við meðaltalið í Evrópu. Fjölgun bílaleigubíla og vöxtur ferðaþjónustunnar hefur aukið það hlutfall. Íslendingar eiga tæplega 0,8 bíla á hvern íbúa en Danir innan við 0,5 bíla.

Fjöldi bensínstöðva

FÍB hefur tekið saman gögn um fjölda bensínstöðva í Evrópu, fjölda bíla í umferð á hverja bensínstöð og fjölda íbúa hvers lands á hverja bensínstöð. Bensínstöðvar eru mismunandi og mikill munur á þjónustu. Um alla Evrópu hefur hlutfall ómannaðra stöðva aukist á sama tíma og stöðvum hefur fækkað. Úttekt FÍB byggir á gögnum frá Hagstofu Íslands, Samgöngustofu, heimasíðum íslenskra eldsneytissala, ACEA, FuelsEurope og Drivkraft Danmark.

Bensínstöðvar í Evrópu: Ísland sker sig úr

Búlgaría með fæsta bíla á bensínstöð

Fæstir bílar á bensínstöð eru í Búlgaríu eða 902 bílar á stöð. Grikkland er í öðru sæti með 1.030 bíla á stöð og þá Ísland með  tæplega 1.200 bíla á stöð.

Flestir bílar á bensístöð eru í Rúmeníu eða 5.603. Þar á eftir kemur Bretland með 4.579 bíla á stöð og Malta í þriðja sæti með 4.292 bíla á stöð.

Ísland sker sig úr miðað við íbúafjölda

Fæstir íbúar á bensínstöð eru á Íslandi eða 1.521. Næst kemur Grikkland, með allar sínar eyjar, með 1.777 íbúa á stöð. Búlgaría er í þriðja neðsta sæti með 1.930 íbúar á stöð.

Flestir íbúar á stöð eru í Rúmeníu eða 12.476. Á Bretlandseyjum eru 8.360 íbúar á hverja stöð og Frakkland er í þriðja sæti með 6.177 íbúa á stöð.

Norðurlöndin

Af Norðurlöndunum er Ísland á toppnum. Danir komast næst okkur með sínar 2.122 bensínstöðvar og 1.346 bíla á stöð. Í Danmörku eru 2.839 íbúar á stöð. Finnar eru með 1.943 bensínstöðvar og þar eru 1.424 bílar á stöð og 2.893 íbúar á stöð. Í Noregi eru 1.823 bensínstöðvar, 1.564 bílar á stöð og 3.101 íbúar á stöð. Í Svíþjóð eru 2.643 bensínstöðvar með 1.883 bíla á stöð og 4.048 íbúa á stöð.