Nú þegar skólahald er að hefjast á ný eftir sumarfrí fjölgar börnum og ungmennum á götum og stígum landsins. Um leið og daginn tekur að stytta og birtuskilyrði breytast er mikilvægt að allir vegfarendur sýni aukna aðgát og tillitssemi í umferðinni. FÍB, Samgöngustofa og fl. hafa ítrekað bent á mikilvægi þess að foreldrar og forráðamenn fari yfir öruggustu leiðir til og frá skóla með börnum sínum og æfi þær með þeim fyrstu dagana.
Ökumenn eru hvattir til að hægja á sér í grennd við skóla, gangbrautir og í íbúðahverfum þar sem yngstu vegfarendurnir eru oft á ferðinni. Börn meta aðstæður í umferðinni ekki alltaf á sama hátt og fullorðnir og geta brugðist óvænt við.
Endurskin skiptir máli
Með haustinu verða morgnar og kvöld sífellt dekkri. Endurskin á fatnaði, skólatöskum og hjólum getur skipt sköpum fyrir sýnileika gangandi og hjólandi vegfarenda. Með einföldum aðgerðum má auka öryggi verulega og auðvelda ökumönnum að greina fólk í tæka tíð. FÍB leggur sérstaka áherslu á mikilvægi endurskins sem hluta af öryggisbúnaði vegfarenda.
Réttur öryggisbúnaður fyrir börn
Öryggi barna í bílum er sameiginlegt ábyrgðarmál. Mikilvægt er að börn séu í viðeigandi barnaöryggisbúnaði sem hæfir aldri, hæð og þyngd þeirra. Rétt festur barnabílstóll eða sessa getur skipt sköpum ef slys verður. Einnig er mælt með að börn séu bakvísandi eins lengi og unnt er á fyrstu árum ævinnar.
Allir í bílnum spenntir
Öryggisbeltið er einfaldasti og áhrifaríkasti öryggisbúnaðurinn í bílnum. Það gildir um alla farþega, í öllum sætum og í öllum ferðum, sama hversu stuttar þær eru. Gott fordæmi fullorðinna skiptir miklu máli og börn læra af því sem þau sjá.
Með aukinni árvekni, góðum öryggisbúnaði og gagnkvæmri tillitssemi getum við öll lagt okkar af mörkum til að skólabyrjun verði örugg og ánægjuleg fyrir börn, foreldra og aðra vegfarendur. Verum sýnileg, spenntum beltin og komum heil heim.
